Хавер Тебас «Реал Мадрид»нинг ҳакамлик бўйича эътирозларига жавоб қайтарди

Ла Лига президенти Хавер Тебас «Реал Мадрид»нинг Мадрид дербисидан кейин ҳакамлик борасида билдирган эътирозларига муносабат билдирди. Унинг фикрича, айрим ҳакамлик хатоларини чемпионатда клубга қарши тизимли муносабат борлигига далил сифатида кўрсатиш нотўғри. Бу ҳақда EFE хабар бермоқда.

Тебас «Реал»га қарши ҳакамлар атайлаб ишлаётгани ҳақидаги фикрларни кескин рад этди. «Ҳакамлар “Реал Мадрид”га қарши йўналтирилганини айтиш — бошқа галактикада яшаш билан баробар. Майдонда нима бўлаётганини таҳлил қилишдан кўра, фитна ҳақида гапириш осонроқ», — деди Ла Лига раҳбари.

Шунингдек, Тебас «Реал»нинг айрим баҳсли эпизодлар юзасидан норозилигини тушунишини, бироқ ҳакамларга босим ўтказиш услубини маъқулламаслигини таъкидлади. У биргина ҳакамлик хатоси «фитна» мавжудлигини исботламаслигини айтиб, «ҳали сентябр, улар эса чемпионатни аллақачон адолатсиз деб аташмоқда», дея фикр билдирди.

Маълумот учун, «Реал Мадрид» Ла Лиганинг 7-турида «Атлетико»га 1:2 ҳисобида имкониятни бой берди. Мазкур учрашувдан кейин мадридликлар ҳакам Мигел Анхел Ортис Ариаснинг бир қатор қарорларига эътироз билдирган эди.