Ханси Флик «Барселона»нинг ёш иқтидорлари борасида кутилмаган қарорга келди
«Барселона» бош мураббийи Ханс-Дитер Флик асосий жамоа ўйинларига захира таркиб (Барселона B) ёшларини жалб этишни камайтиришга қарор қилди. Бу ҳақда Sport.es нашри хабар бермоқда.
Германиялик мутахассиснинг ушбу қарори «Барселона B» бош мураббийи Жулиано Беллетти ихтиёрида кўпроқ футболчи бўлишини таъминлашга қаратилган. Флик ёшларни асосий жамоа машғулотларига камроқ чақириш орқали иккинчи жамоанинг ўз таркиби билан кўпроқ ишлашга шароит яратмоқчи. Бундан кўзланган асосий мақсад — захира жамоасининг натижаларини яхшилаш ва уларнинг Испания тўртинчи дивизионидан юқорига кўтарилишига ёрдам беришдир.
Таъкидлаш жоизки, бунгача Ханс-Дитер Флик ёш футболчиларни тез-тез асосий жамоа қайдномасига киритиб келаётган эди, бироқ уларнинг аксарияти етарли ўйин амалиётига эга бўлмаётганди. Бунинг ёрқин мисоли сифатида 17 ёшли ҳужумчи Тони Фернандесни кўрсатиш мумкин. У «кўк-анорранглилар»нинг 12 та учрашувида қайдномага киритилган бўлса-да, майдонда атиги бир маротаба 45 дақиқа ҳаракат қилган.
Ушбу янги стратегия клуб академияси битирувчиларининг ўйин амалиётини барқарорлаштириш ва уларнинг профессионал ўсишини таъминлаш йўлидаги муҳим қадам бўлиши кутилмоқда.
