Ханс-Дитер Флик Левандовскининг шартномаси ҳақида: «Ҳозир бу ҳақда гапирадиган вақт эмас»
«Барселона» бош мураббийи Ханс-Дитер Флик жамоа ҳужумчиси Роберт Левандовскининг клубдаги келажаги ва шартномаси билан боғлиқ вазиятга муносабат билдирди.
«Биз унинг ҳолатини муҳокама қилдик. Мавсум ҳали якунлангани йўқ, у бор эътиборини ўйинга қаратши ва футболдан завқ олиши керак. Биламан, у кўпроқ ўйин амалиётига эга бўлишни истайди, лекин у ҳаммасини тўғри бажармоқда. Умид қиламанки, унга ҳозирги ҳолат ва клуб ёқмоқда. Ҳозир бу мавзуни муҳокама қиладиган вақт эмас, барчамиз клубдаги вазиятни яхши биламиз. Мен хотиржамман, чунки биз барчасини тўғри йўлда бажаряпмиз», — дея Фликнинг сўзларини келтиради AS нашри.
Аввалроқ ОАВда «Барселона» 37 ёшли Левандовски билан шартномани узайтириши мумкинлиги, бироқ бунда поляк ҳужумчининг маоши камайтирилиши ҳақида хабарлар тарқалган эди.
Маълумот учун, Левандовски 2022 йилнинг ёзидан буён «кўк-анорранглилар» шарафини ҳимоя қилиб келмоқда. Жорий мавсумда у барча мусобақаларда 27 та учрашувда майдонга тушиб, 12 та гол ва 3 та самарали узатмага муаллифлик қилди.
Футболчининг клуб билан амалдаги келишуви 2026 йилнинг ёзига қадар мўлжалланган. Transfermarkt портали ҳужумчининг бозор қийматини 9 миллион евро деб баҳолаган.
