Ханс-Дитер Флик «Барселона» билан янги шартнома шартларини келишиб олди
«Барселона» бош мураббийи Ханс-Дитер Флик клуб раҳбарияти билан амалдаги ҳамкорликни узайтириш бўйича келишувга эришди. Янги келишувга кўра, германлик мутахассис каталанлар сафида 2028 йилгача қоладиган бўлди. Шунингдек, шартномада ҳамкорликни яна бир мавсумга узайтириш имконияти ҳам кўзда тутилган. Бу ҳақда журналист Рожер Торелло хабар бермоқда.
Ҳозирда амалда бўлган меҳнат шартномаси 2027 йилнинг ёзига қадар белгиланган эди. Келаси ҳафтада Фликнинг агенти Пини Захави шартноманинг сўнгги деталларини якунлаш учун Барселонага ташриф буюриши кутилмоқда. Германлик мутахассис «Барселона» расман Испания чемпионлигини қўлга киритиши билан янги битимга қўл қўйиши режалаштирилган.
Айни дамда клуб Испания чемпионатида мутлақ устунлик қилмоқда. Ўтказилган 33 тур якунларига кўра, «кўк-анорранглилар» ўз ҳисобларига 85 очко жамғарган ҳолда турнир жадвалида биринчи ўринни эгаллаб туришибди. Жамоа энг яқин таъқибчиси — иккинчи поғонадаги Мадриднинг «Реал» клубидан нақ 11 очко олдинда бормоқда.
Ла Лиганинг жорий мавсуми якунланишига яна бешта тур қолганини инобатга олсак, «Барселона» яқин ўйинларда чемпионликни расман расмийлаштириши ва Флик билан янги узоқ муддатли шартномани имзолаши кутилмоқда.
