Хаби Алонсо «Челси» билан 2030 йилгача мўлжалланган шартнома имзолайди — Романо
Испаниялик мутахассис Хаби Алонсо яқин вақт ичида Лондоннинг «Челси» клуби бош мураббийи сифатида эълон қилинади. Бу ҳақда таниқли инсайдер Фабрицио Романо хабар берди.
Лондон клуби 44 ёшли мутахассис билан 2030 йилнинг июнигача мўлжалланган тўрт йиллик шартнома имзолайди. Маълум қилинишича, томонлар келишувнинг барча деталларини ҳал қилиб бўлишган. Алонсо яқин кунларда Лондонга етиб келади ва янги жамоасида иш бошлайди. Аввалроқ клуб ва мураббий ўртасида оғзаки ва принципиал келишувга эришилгани ҳақида хабарлар тарқалган эди.
Хаби Алонсонинг мураббийлик фаолиятидаги сўнгги манзили Мадриднинг «Реал» клуби бўлган эди. У «қироллик клуби»ни 2025 йилнинг июнидан 2026 йилнинг 12 январига қадар бошқарган. Бу вақт ичида жамоа унинг қўл остида 28 та учрашув ўтказиб, қуйидаги натижаларни қайд этган:
- Ғалаба: 20 та
- Дурранг: 3 та
- Маглубият: 5 та
Эслатиб ўтамиз, испаниялик мутахассис Германиянинг «Байер» клубидаги муваффақиятли фаолияти орқали ҳам танилган бўлиб, Леверкузен жамоаси билан ўз тарихида илк бор Бундеслигада чемпионлик шоҳсуласини қўлга киритган эди.
