Гвардиола: Асосий талабим — жамоа соғлом бўлиши
Англия гранди “Манчестер Сити” янги мавсум арафасида жамоа ичидаги асосий масалаларни муҳокама қилмоқда. Бош мураббий Хосеп Гвардиола матбуотга берган сўнгги изоҳида марказий ҳимоя ва жамоага қўйган асосий талабини тилга олди.
Испаниялик мутахассис айни пайтда муҳим рол ўйнаётган Рубен Диаш – Жон Стоунз жуфтлигини алоҳида таъкидлаб, улар жамоа ўйинидаги барқарорлик учун катта аҳамиятга эга эканини қайд этди. Шу билан бирга, Йошко Гвардиол, Мануэл Аканжи, Натан Аке ва ёш иқтидор Абдуқодир Ҳусановни ҳам клуб учун муҳим футболчилар сифатида эътироф этди.
“Ҳар бирига ишончим катта, уларнинг борлиги биз учун улкан имконият”, — деди Гвардиола.
Шунингдек, у янги мавсум олдидан ўзининг энг катта талабини ҳам очиқ қилди:
“Менинг ягона истагим — жамоа соғлом бўлиши. Жароҳатлар футболнинг ажралмас қисми, аммо ўтган мавсумдагидек кўпайиши мутлақо керак эмас. Асосийси, футболчилар майдонга чиқиб рақобат қила олишлари”, — дея таъкидлади испаниялик мураббий.
