Гранит Джака қалбаки COVID-сертификат сотиб олганини тан олди
«Сандерленд» ярим ҳимоячиси ва Швейцария терма жамоаси сардори Гранит Джака 2022 йилда COVID-19 вакцинациясини тасдиқловчи қалбаки сертификат сотиб олганини тан олди. Футболчи бу қарорини хато деб атаб, жамоатчиликдан узр сўради ва тергов билан ҳамкорлик қилишини билдирди. Бу ҳақда Blick нашри футболчининг баёнотига таяниб хабар бермоқда.
Джанинг айтишича, ўша пайтда вакцина борасида унда жиддий хавотир бўлган ва шу сабаб эмланиш ўрнига сохта ҳужжат сотиб олиш йўлини танлаган. «Бугун бу нотўғри қарор бўлганини тушунаман. Бу хато эди ва бундан афсусдаман», — дея футболчининг сўзлари келтирилмоқда.
Люцерн кантони прокуратураси ушбу ҳолат юзасидан тергов олиб бормоқда. Швейцария қонунчилигига кўра, ҳужжатларни қалбакилаштириш учун беш йилгача озодликдан маҳрум қилиш жазоси назарда тутилган. Шу билан бирга, якуний жазо иш тафсилотлари ва суд қарорига боғлиқ бўлади.
Маълумот учун, Джака айни пайтда Англиянинг «Сандерленд» клубида тўп тепмоқда. У Швейцария терма жамоаси сардори ҳисобланади ва миллий жамоа сафида 100 дан ортиқ учрашув ўтказган.
