Германиялик иқтисодчи ЖЧ-2026 ғолибини башорат қилди
Немис иқтисодчиси Йоахим Клемент 2026 йилги Жаҳон чемпионати ғолибини прогноз қилди. Муттахассиснинг фикрича, навбатдаги жаҳон биринчилигида Нидерландия терма жамоасини муваффақият кутмоқда ва улар финалда Португалия терма жамоасини мағлуб этишади. Қайд этиш жоизки, Клемент бундан аввал ЖЧ-2014 (Германия), ЖЧ-2018 (Франция) ва ЖЧ-2022 (Аргентина) ғолибларини аниқ топган эди.
«Бразилияда Германия жаҳон чемпиони бўлганида биринчи марта дахшатга тушгандим, чунки ўшанда барча экспертлар шу пайтгача бирон бир Европа жамоаси Жанубий Америкада ўтган Жаҳон чемпионатида ғолиб чиқмаганини таъкидлашар эди.
Бу мутлақо иррационал нарса. Бу худди лотерея ўйнашга ўхшайди. Мен доим айтаманки, агар кимдир менинг кейинги жаҳон чемпиони ким бўлиши ҳақидаги прогнозимга таянишиб пул тикадиган бўлса, унга энди ҳеч нарса ёрдам бера олмайди.
Бу худди танга ташлашдек гап. Танга кетма-кет тўрт марта рақам томони билан тушишини тахмин қилишингиз мумкин ва бу ҳақиқатан ҳам содир бўлиши эҳтимолдан ҳоли эмас. Аммо бу кейинги сафар ҳам худди шундай такрорланишига кафолат йўқ», — дея Клементнинг сўзларини келтирмоқда Der Spiegel нашри.
Клементнинг модели ҳар бир мамлакатнинг аҳоли жон бошига тўғри келадиган ЯИМ (бу спорт инфратузилмасига таъсир қилади), аҳоли сони, футболдаги ижтимоий мақом, терма жамоанинг дунё рейтингидаги ўрни каби бир қатор асосий кўрсаткичларни ҳамда «омад» омилига тенглаштирилган тасодифийлик элементни ҳисобга олади.