Германия Кубогидаги тартибсизлик оқибатида 85 киши жароҳат қилди
Германия Кубогининг биринчи босқичидан ўрин олган “Валдҳоф Манҳайм” — “Кайзерслаутерн” учрашуви оммавий тартибсизликлар билан якунланди. Баҳсдан сўнг футболчилар ўртасида келиб чиққан тортишув трибунадаги мухлисларга ҳам кўчиб, вазият кескинлашди.
Мухлислар бир-бирига турли буюмлар, жумладан пиротехника воситаларини улоқтира бошлаган. Орадан кўп ўтмай, айрим ишқибозлар майдонга бостириб кирган. Тартибни тиклаш учун ҳуқуқ-тартибот ходимлари аралашган, воқеа жойига отлиқ бўлинмалар ҳам жалб қилинган.
Расмий маълумотларга кўра, тартибсизликлар оқибатида жами 85 кишига тиббий ёрдам кўрсатилган, улардан саккиз нафари шифохонага олиб кетилган. Шунингдек, 35 нафар ҳуқуқ-тартибот ходими енгил жароҳат олган. Бир нечта мухлис вақтинча қўлга олинган, ҳодиса юзасидан тергов бошланган.
Маълумот учун, учрашувнинг асосий вақти 0:0 ҳисобида якунланган. Қўшимча бўлимларнинг сўнгги дақиқасида Иброҳим Канате гол уриб, “Кайзерслаутерн”га 1:0 ҳисобидаги ғалаба ва Германия Кубогининг кейинги босқичига йўлланма келтирди.
