Германия футбол иттифоқи раҳбари Инфантинонинг мактубини қайта сайланиш учун қилинган ҳаракат деб атади
Германия футбол иттифоқи президенти Бернд Нойендорф ФИФА раҳбари Жанни Инфантинонинг ташкилотга аъзо 211 та ассоциацияга юборган мактубига муносабат билдирди. Нойендорфнинг фикрича, ФИФА бошқарувида ислоҳотлар ўтказишни таклиф қилган ушбу мурожаат Инфантинонинг 2027 йилги президентлик сайловида қайта сайланишига хизмат қилиши мумкин. Бу ҳақда Reuters хабар бермоқда.
Манбага кўра, Инфантино мактубида ФИФАнинг муҳим стратегик қарорларни қабул қилиш тизимини мустақил равишда кўриб чиқиш, шаффофлик ва ҳисобдорликни ошириш бўйича маслаҳатлашувлар ўтказишни таклиф қилган. Бу ташаббус ФИФАнинг тижорий ҳуқуқларидаги 20 фоизлик улушни хусусий инвесторларга сотиш режаси кескин қаршиликка учраб, бекор қилинганидан кейин илгари сурилди.
Нойендорф эса Инфантинонинг ўзи бундай ислоҳотларга раҳбарлик қилиши кераклигига шубҳа билдирди. «Мен Жанни Инфантинонинг мактубини келаси йилги қайта сайланишини таъминлашга қаратилган очиқ ҳаракат деб биламан», — деди ДФБ раҳбари. У, шунингдек, ФИФАда ўзгаришлар зарурлиги тан олинганини ижобий баҳолаган, бироқ Инфантинонинг ишончни йўқотганини таъкидлаган.
Маълумот учун, ФИФА президентлиги учун навбатдаги сайлов 2027 йил март ойида Работда ўтказилиши режалаштирилган. Сўнгги ойларда УЕФА ва айрим миллий футбол ассоциациялари ФИФА бошқарувида ўзгаришлар зарурлигини очиқ айтиб келмоқда.
