Германия футбол иттифоқи Клоппга йиллик 7 миллион евролик шартнома таклиф қилди
Германия футбол иттифоқи (DFB) мураббий Юрген Клоппга тўрт йиллик шартнома ва йилига 7 миллион евро маош таклиф қилди. Бу ҳақда Bild нашри хабар берди.
Манба маълумотига кўра, 59 ёшли мутахассис Германия терма жамоасининг собиқ бош мураббийи Юлиан Нагельсмандан кўпроқ маош олади. Аввалроқ оммавий ахборот воситалари Нагельсманнинг йиллик маоши 4–6 миллион евро атрофида бўлганини хабар қилган эди.
Клопп 2025 йилдан буён Red Bull компаниясида халқаро футбол алоқалари бўйича директор лавозимида ишлаб келмоқда. Унинг мазкур ташкилот билан шартномаси 2029 йил охиригача амал қилади.
Бунгача эса немис мутахассиси 2015–2024 йиллар давомида Англиянинг «Ливерпуль» клубини бошқарган.
Эслатиб ўтамиз, 3 июль куни Германия футбол иттифоқи Юлиан Нагельсман билан шартномани муддатидан аввал бекор қилганини ва Юрген Клопп билан музокараларни бошлаш ниятида эканини расман маълум қилган эди.
