Гари Невилл: «Гвардиола, Доннарумма ва Холанд «Ман Сити»га АПЛ чемпионлигини тақдим этиши мумкин»
«Манчестер Юнайтед» афсонаси ва таниқли эксперт Гари Невилл жорий мавсумда «Манчестер Сити»га Англия Премьер-лигасида ғалаба қозониш учун кимлар ёрдам бериши мумкинлиги ҳақида ўз фикрлари билан ўртоқлашди. Sky Sports нашрига берган интервьюсида мутахассис жамоанинг имкониятларини юқори баҳолаган бўлса-да, асосий рақибга ҳам тўхталиб ўтди.
Невиллнинг таъкидлашича, айни дамда «Арсенал» таркиб ва ўйин барқарорлиги жиҳатидан чемпионатнинг энг яхши жамоаси бўлиб турибди. Бироқ эксперт Пеп Гвардиола ва унинг етакчи шогирдларини ҳисобдан чиқаришга шошилмаслик кераклигини уқтирди. Унинг фикрича, жамоанинг муваффақияти учта асосий шахсга — дарвозабон Жанлуижи Доннарумма, ҳужумчи Эрлинг Холанд ва бош мураббий Хосеп Гвардиолага боғлиқ. Гари Невилл айнан мана шу учлик «шаҳарликлар»га навбатдаги чемпионликни олиб келиши мумкин бўлган ҳал қилувчи куч эканлигини алоҳида қайд этди.
Маълумот ўрнида айтиш жоизки, Англия Премьер-лигасининг 24-туридан сўнг «Манчестер Сити» 47 очко жамғарган ҳолда турнир жадвалининг иккинчи поғонасида бормоқда. Невиллнинг эътирофича, гарчи жамоа ҳозирда энг яхши футболини намойиш этмаётган бўлса-да, мураббий ва юқоридаги юлдуз футболчиларнинг салоҳияти вазиятни тубдан ўзгартиришга қодир.
