«Галатасарой» Леауни ўз таркибига қўшиб олмоқчи
«Галатасарой» клуби келаси мавсум учун таркибини сифатли кучайтиришдан манфаатдор.
La Gazzetta dello Sport журналисти Лука Бьянкиннинг хабар беришича, клуб Италиянинг «Милан» клубида ўйновчи 26 ёшли португалиялик вингер Рафаэл Леауга қизиқиш билдирмоқда.
Манбага кўра, «Галатасарой» португалиялик футболчига солиқлар тўланганидан сўнг йилига 10 миллион евролик шартнома таклиф қилишга тайёр. Эҳтимолий трансфер суммаси 40 миллион евродан 50 миллион еврогача бўлиши мумкин.
Эътиборлиси, аввалроқ Леауга Туркиянинг бошқа бир клуби – «Фенербахче» ҳам қизиқиш билдирган эди. Айни пайтда Туркия клубларидан ҳеч бири Леау масаласида «Милан» билан боғланмаган, бироқ футболчининг вакиллари Европанинг етакчи лигалари клубларидан аниқ таклифлар кутишмоқда.
Леаунинг «Милан» билан шартномаси 2028 йилнинг ёзигача мўлжалланган. Trаnsfermarkt портали маълумотларига кўра, футболчининг нархи 65 миллион еврони ташкил қилади.
