Габриэл Жезус Фликдан кўпроқ ўйин вақти сўради
«Барселона» ҳужумчиси Габриэл Жезус бош мураббий Ханси Фликдан унга кўпроқ ўйин вақти беришни сўради. Бразилиялик футболчи имкониятлардан унумли фойдаланаётганини ҳисобга олиб, яқин учрашувлардан бирини асосий таркибда бошлашни истамоқда. Бу ҳақда Globo Esporte нашри хабар бермоқда.
Манбага кўра, Жезус «Расинг»га қарши 7:2 ҳисобида якунланган учрашувда захирадан майдонга тушиб, яна гол уришга муваффақ бўлган. Ҳужумчининг сўнгги ўйинлардаги самарадорлигидан клуб раҳбарияти ҳам мамнун. Айниқса, унинг трансферини қўллаб-қувватлаган спорт директори Деку футболчининг тез мослашаётганидан қониқиш билдирган.
Шу билан бирга, асосий таркибдан жой олиш Жезус учун осон бўлмайди. Рафинья ва Ламин Ямал ҳужум чизиғининг муҳим футболчилари ҳисобланади, чап қанотда эса Карим Адейеми ҳамда Энтони Гордон юқори даражада ўйнамоқда. Шунга қарамай, Жезус ўзига берилаётган қисқа вақт ичида натижа кўрсатиб, Фликнинг танловига жиддий даъвогарлик қилмоқда.
Маълумот учун, Габриэл Жезус «Барселона» сафида ҳозирга қадар 3 та учрашувда 37 дақиқа майдонда ҳаракат қилиб, 2 та гол урган. У Чемпионлар лигасида «Фейеноорд»га, Ла Лигада эса «Расинг»га қарши рақиб дарвозасини ишғол қилган. Бразилиялик ҳужумчининг ўртача кўрсаткичи — тахминан ҳар 18,5 дақиқада битта гол.
