Футзал. Тўпурарлар пойгасида муросасиз рақобат пайдо бўлмоқда
Мамлакат миллий чемпионати – Олий лига баҳсларининг тўпурарлар пойгасида ҳам рақобат жуда жиддий кечмоқда. Ўтган мавсум тўпурари Музаффар Ахаджонов бу йил ҳам дарвозабонларнинг “қўрқинчли туши”га айланмоқда. BMB PFC голеадори 9 та ўйинда рақиблари дарвозасига 12 та гол киритди.
Шунингдек, “Oil Star” етакчиси Элбек Тўлқинов ҳам сермахсуллик борасида ажойиб натижа кўрсатмоқда. Бухороликлар ҳужумчиси ҳам Музаффар сингари ўз ҳисобига 12 та гол ёздириб қўйди. "BMB PFC"нинг ёрқин ҳужумчиси Oliveira de Jesus Sousa Hebberth — Bolt эса 11 та гол билан учинчи ўринни эгаллаб турибди.
Жиззахликларнинг “таран” ҳужумчиси Vitor Manuel da Silva 8 та гол билан тўртинчи ўринга чиқиб олган бўлса, бир йўла уч футзалчи – Беҳруз Самиев, Joao Florensio da Silva Neto ҳамда Berrio Hoyos Kristian Alberto 7 та гол билан кейинги поғоналарда боришмоқда.
