Футзал. Тошкент вилояти истеъдодлари ўзларини намоён этишди
Ўзбекистон футзал федерациясининг "Истеъдодларни излаймиз" лойиҳаси навбатдаги манзил сифатида Тошкент вилоятига ташриф буюрди. Чирчиқ шаҳридаги "Кимёгар" спорт мажмуасида ташкил этилган селекцияда 2008-йилда ва ундан кейин туғилган қарийб 40 нафар ёш футзалчи ўз маҳоратини намоён этди.
Саралаш жараёнини Ўзбекистон ёшлар терма жамоаси бош мураббийи Нодир Элибоев, ўсмирлар терма жамоаси бош мураббийи Шуҳрат Тожибоев, ЎФФ терма жамоалар билан ишлаш департаменти бошлиғи Рустам Зупаров ҳамда ҳудуд мураббийлари кузатиб боришди.
Машғулотлар давомида иштирокчиларнинг жисмоний тайёргарлиги, техник маҳорати, тактик фикрлаши ва футзални англаш даражаси синовдан ўтказилди. Назорат учрашувларида эса ёшлар ўзларининг ҳақиқий имкониятларини намоён этишди. Якунда энг иқтидорли футзалчилар мураббийлар эътиборига тушиб, кейинги босқич учун тавсия этилди.
Шу тариқа, мамлакатимизнинг барча ҳудудларида режалаштирилган селекция босқичлари муваффақиятли якунланди.
