Футзал. Қизиқарли маълумотлар рақамлар билан ифодаланганда
Бу турда жамоалар 15 та учрашувда дарвозаларга 82 та гол киритишди. Бу ўтган турдагига нисбатан 8 та тўпга яхшиланди, дегани. Мухлислар ўртача ҳар битта ўйинга 5,46 тадан голни томоша қилишди.
Тур доирасида амалдаги чемпион — "BMB PFC" ҳамда Тошкентнинг “Локомотив” жамоалари юз фоизлик натижа кўрсатди. Шу ўрнида, ҳар иккала жамоага бу турда биттадан ўйинда техник ғалаба ёзилганини ҳам эслатиб ўтамиз.
11-турда юз фоизлик натижа қайд этган "BMB PFC" ҳамда “Локомотив”дан ташқари, Қаршининг "Насаф", Тошкент вилоятининг ОКМК ҳамда Бухоронинг “Оил Срат” жамоалари ҳам мағлубиятсиз ўтказди. Пойтахт вилояти вакиллари битта ўйинда дуранг қайд этган бўлишса, бухороликлар ҳамда қашқадарёликлар иккита ўйинда муроса кўчасини танлашга мажбур бўлди.
Кейинги турларда бўлаётгани каби мамлакат миллий чемпионатидан четлатилган “Сурхон” жамоасига бу турда ҳам учта техник мағлубият ёзилди.
11-турда “Қизилқум” барча учта учрашувда имкониятни бой берди. “Динамо” ҳамда “Нефтчи” жамоалари эса биттадан очко билан кифояланишди.
Турнинг энг сермаҳсул жамоаси СҚБ бўлди – 12 та гол. Битта ғалаба, битта дуранг, битта мағлубият қайд этган “қалдирғочлар” рақиблари дарвозасини 10 марта ишғол этишди. Тур мезбонлари — "Насаф" учта учрашувда 9 гол киритган бўлса, чемпионлик унвонини расмийлаштирган "BMB PFC" эса иккита учрашувда 8 та гол киритди;
Турда энг кўп гол ўтказиб юборган жамоа “Қизилқум” бўлди – 14 та гол. Кейинги натижа “Динамо” (11) ва “Бунёдкор” (11) жамоаларига тегишли;
Турда энг кам гол ўтказган жамоалар “BMB PFC” ва ОКМК бўлди – 3 тадан гол;
Турда энг кам гол урган жамоа “Нефтчи” бўлди – 4 та гол. “Динамо” (5) ва “Қизилқум” (6) кейинги натижаларни қайд этишди;
Энг йирик ҳисоб “Максам-Чирчиқ” – “Динамо” ҳамда СҚБ – “Максам-Чирчиқ” учрашувларида қайд этилди – 5:0;
Энг сермаҳсул ўйин: “Локомотив” – “Қизилқум” (6:4) учрашуви бўлди. Дарвозаларга 10 та гол киритилди;
Энг кам гол урилган ўйин: “Локомотив” – “Нефтчи” – 1:0;
