Футбол бўйича Жаҳон чемпионати-2026: чипталар нархи ва сотиб олиш тартиби маълум қилинди
Футбол бўйича Жаҳон чемпионати-2026 11 июнь куни бошланади ва 19 июлга қадар давом этади. Ушбу мусобақа тарихда илк бор учта мамлакатда — АҚШ, Канада ва Мексикада ташкил этилади ва унда 48 терма жамоа иштирок этади.
Сотув қачон бошланди?
2025 йил 6 май куни АҚШда бўлиб ўтадиган ўйинлар учун премиум меҳмондўстлик пакетларини сотишнинг биринчи босқичи бошланди. Ушбу махсус чипталар FIFA’нинг эксклюзив ҳамкори OnLocation орқали тарқатилмоқда. Нархи бир киши учун $5300дан бошлаб $73 200гача етади.
Оддий чипталарни қандай сотиб олиш мумкин?
FIFA одатда чипталарни тўрт босқичда сотувга қўяди:
1. Тасодифий лотерея — мурожаатлар қабул қилиниб, омадли иштирокчилар танлаб олинади;
2. Жонли навбат — гуруҳ босқичи қуръаси ўтказилгандан кейин;
3. Иккинчи лотерея — чипта сотиб олиш учун яна бир имконият;
4. Якунловчи сотув — қолган чипталар фақат навбат асосида сотилади.
Нархлар қанча бўлади?
Расмий маълумотга кўра, оддий чипталар ҳали сотувга чиқмаган, бироқ тахминий нархлар финал учун $300–1100, гуруҳ босқичи учун эса $50–250 оралиғида бўлиши мумкин.