«Фулҳем» Гарри Уилсонни жамоада сақлаб қолиш учун ҳаракат қилмоқда
«Фулҳем» клуби жамоа яримҳимоячиси Гарри Уилсон билан шартномани узайтириш устида фаол иш олиб бормоқда. Бу ҳақда Evening Standard нашри хабар бермоқда.
Футболчининг лондонликлар билан амалдаги келишуви шу ёзда ўз ниҳоясига етади. Уилсоннинг эркин агентга айланиш эҳтимоли Премьер-лиганинг бир қатор клублари эътиборини тортмоқда, бу эса жамоани тезроқ ҳаракат қилишга мажбур қилмоқда.
Ўтган ҳафтада «Эвертон» уэльслик хавбекни ўз сафига қўшиб олишга уриниб кўрди, бироқ Лондон клуби бу таклифни рад этди. Жамоа бош мураббийи Марку Силва ҳам ушбу трансфернинг амалга ошишига «ҳеч қандай имконият бўлмаганини» тасдиқлади.
Қайд этилишича, Гарри Уилсоннинг якуний қарори мураббий Марку Силванинг келажаги билан боғлиқ бўлиши мумкин. Мутахассиснинг клуб билан шартномаси ҳам 2026 йилнинг ёзига қадар мўлжалланган. Футболчи мураббий билан олиб борилаётган музокаралар натижасини кутмоқда.
Маълумот учун, Гарри Уилсон «Фулҳем» лойиҳасининг муҳим бўлакларидан бири ҳисобланади. У жамоа сафида жами 173 та ўйинда майдонга тушиб, 34 та гол урди ва 43 та голли узатмани амалга оширди.
