Френки де Йонг “Барселона”нинг умумий машғулотларига қайтди
“Барселона” ярим ҳимоячиси Френки де Йонг узоқ давом этган жароҳатдан сўнг жамоа билан машғулотларни қисман тиклади. Нидерландиялик футболчи қарийб тўрт ойлик танаффусдан кейин яна жамоадошлари билан шуғуллана бошлади. Бу ҳақда Mundo Deportivo нашри хабар бермоқда.
Манбага кўра, де Йонг аввал индивидуал дастур асосида тайёргарлик олиб бораётган эди. Энди у тикланишнинг навбатдаги босқичига ўтиб, машғулотларнинг бир қисмини умумий гуруҳ билан бажармоқда. Футболчининг майдонга қайтишига шошилмаслик ва жисмоний ҳолатини босқичма-босқич тиклаш режалаштирилган.
29 ёшли ярим ҳимоячи Жаҳон чемпионати вақтида ўнг тиззасининг ички ён боғламидан жароҳат олган. Де Йонг операция қилдиришдан воз кечиб, консерватив даволаниш усулини танлаган. Шу сабаб у 2026/27 мавсумида ҳали “Барселона” сафида расмий учрашувда майдонга тушмаган.
Маълумот учун, “Барселона” Ла Лиганинг дастлабки 7 турида 21 очко жамғариб, турнир жадвалида пешқадамлик қилмоқда. Де Йонгнинг ўйинларга қайтиши учун эса яна бир неча ҳафта керак бўлиши мумкин.
