Францияда мухлисларга стадионда сиёсий норозилик билдириш тақиқланди
Франция футбол федерациясининг этика бўйича масъул органи мухлислардан стадионларда сиёсий норозилик намойишларини ўтказмасликни талаб қилди. Ушбу чақириқ мамлакатда давом этаётган талабалар намойишлари ва футбол учрашувларида намойиш этилган баннерлардан сўнг янгради. Бу ҳақда Associated Press ахборот агентлиги хабар бермоқда.
Манбага кўра, «Ланс» ва «Лион» ўртасидаги Лига 1 учрашувида мезбон мухлислар полиция ҳаракатларини қораловчи баннер кўтарган. ПСЖ ва «Ле-Ман» ўйинида ҳам ишқибозлар намойишчиларга бирдамлик билдиришган. Мазкур ҳолатлар Франция футболидаги этика бўйича миллий кенгаш эътиборини тортган.
Ташкилот мухлисларнинг норозилигига сабаб бўлаётган воқеаларни тушунишини билдирган. Бироқ спорт майдонларида сиёсий, мафкуравий ва бошқа шу турдаги тарғиботларга йўл қўйилмаслиги кераклигини таъкидлаган. Кенгаш стадионлар турли қарашлар ўртасидаги баҳс майдонига эмас, футбол байрами ўтказиладиган масканга айланиши лозимлигини қайд этган.
Маълумот учун, Францияда талабалар норозиликлари ортидан полиция билан тўқнашувлар юз берган. Мамлакат бўйлаб минглаб намойишчилар қўлга олинган. Ушбу вазият футбол мухлисларининг ҳам муносабат билдиришига сабаб бўлган. Федерация этика кенгашининг баёноти эса ишқибозларни сиёсий бетарафлик тамойилига риоя қилишга чақиришга қаратилган.
