Франческо Тотти «Рома»га қайтиши мумкин
«Рома» клуби ва Италия терма жамоасининг афсонавий собиқ ҳужумчиси Франческо Тотти ўзининг қадрдон жамоасига қайтиши мумкинлиги ҳақидаги хабарларга муносабат билдирди.
«Рома»га қайтиш? Биз буни муҳокама қиляпмиз. Ҳали аниқлаштирилиши керак бўлган бир неча деталлар бор, бироқ шуни айта оламанки, иш кетяпти. Кўрамиз, воқеалар ривожи қандай кечар экан. Ҳозирча бундан ортиғини айта олмайман», — дея Тоттининг сўзларини келтиради Sky Sport Italia.
Аввалроқ матбуотда Франческо Тотти клубга техник директор лавозимида қайтиши мумкинлиги ҳақида хабарлар тарқалган эди. Маълумот учун, Тотти «Рома» тарихи бўйича энг яхши тўпурар ҳисобланади — у жамоа либосида 785 та ўйинда майдонга тушиб, 307 та гол урган. Италиялик футболчи 2017 йилда профессионал фаолиятини якунлаган эди.
Ҳозирда «Рома» Италия А Серияси турнир жадвалида 4-ўринни эгаллаб турибди ва Чемпионлар Лигаси йўлланмаси учун жиддий кураш олиб бормоқда.
