Франческо Тотти нега 48 ёшида «Комо» ва «Женоа» таклифларини рад этганини айтди
«Рома» афсонаси Франческо Тотти 48 ёшида профессионал футболга қайтиш имконияти бўлганини маълум қилди. Италиялик собиқ футболчининг айтишича, унга «Комо» ва «Женоа»дан таклиф тушган, бироқ у иккаласини ҳам рад этган. Бу ҳақда Тотти ўзининг янги «Oltre» китобида ёзган.
Тоттининг сўзларига кўра, жисмоний жиҳатдан у яна майдонга қайтишга тайёр бўлган. Аммо қарор қабул қилишда битта савол унга тинчлик бермаган: агар керак бўлса, у «Рома»га қарши ўйнай олармиди? Тотти бу саволга ич-ичидан «йўқ» деб жавоб бергани учун таклифлардан воз кечганини айтган.
Тотти бутун профессионал фаолиятини «Рома» сафида ўтказган. У Рим клуби шарафини 1993-йилдан 2017-йилгача ҳимоя қилиб, 785 та учрашувда майдонга тушган ва 307 та гол урган. Шу сабаб «Рома»га қарши ўйнаш эҳтимоли унинг учун қайтишдан воз кечишдаги асосий омил бўлган.
Маълумот учун, Франческо Тотти 2017-йилда футболчилик фаолиятини якунлаган. У «Рома» тарихидаги энг рамзий футболчилардан бири ҳисобланади ва клуб сафида деярли чорак аср давомида тўп тепган.
