France Football собиқ бош муҳаррири: «Роналдунинг орзуси Мессидан кўпроқ «Олтин тўп» ютиш эканини айтгандим»
France Football нашрининг собиқ бош муҳаррири Паскал Ферре Криштиану Роналду билан 2021 йилда юзага келган келишмовчилик ҳақида гапириб ўтди.
Ўшанда Ферре португалиялик футболчининг асосий орзуси Лионель Мессидан кўпроқ «Олтин тўп» ютиш эканини айтганди. Роналду эса бу гапларни ёлғон деб атаб, мақсади Месси билан рақобатлашиш эмас, балки совринларни қўлга киритиш эканини таъкидлаган.
«Ўша пайтда турли ОАВга «Олтин тўп» ҳақида интервьюлар берардик. The New York Times билан суҳбатда Криштианунинг орзуси Мессидан кўпроқ «Олтин тўп» ютиш эканини айтгандим.
Ўйлашимча, унчалик тўғри иш қилмаганман. Балки сукут сақлашим керак эди. Бироқ унинг жуда катта мақсадларга интиладиган ва рақобатбардош инсон экани сир эмас эди.
У менга шахсан ҳеч нарса демади, аммо кейин ижтимоий тармоқларда жавоб қайтарди. Очиғини айтсам, унинг миллионлаб обуначилари олдида ёлғончи бўлиб кўриндим. Лекин умуман олганда, бунда қўрқинчли ҳеч нарса йўқ», — деди Ферре Marca нашрига берган интервьюсида.
Эслатиб ўтамиз, Роналду 30 сентябрь куни Португалия миллий жамоаси қароргоҳини тарк этганди. Футболчи ва бош мураббий Жезуш ўртасидаги келишмовчилик Норвегияга қарши Миллатлар лигаси доирасидаги учрашув (2:1)дан кейин юзага келган. Ўша баҳсда Роналду 18 йил ичида илк бор миллий жамоанинг расмий ўйинини тўлиқ захира ўриндиғида ўтказган.
