Флорентино Перес: «Вальверде ва Чуамени ўртасидаги муштлашув ҳақидаги маълумотни тарқатган шахс топилди»
Мадриднинг «Реал» клуби президенти Флорентино Перес жамоа яримҳимоячилари Федерико Вальверде ва Аурельен Чуамени ўртасидаги муштлашув тафсилотларини ОАВга ошкор қилган шахс аниқланганини маълум қилди.
«Биз Вальверде ва Чуамени ўртасидаги жанжал ҳақидаги маълумотни ташқаридан чиқарган одамни топдик. Ушбу шахс клубдан кетиши сабабли ғазабга тўлган ва айнан шу боис бу маълумотни тарқатган», — деди Перес матбуот анжуманида.
Эслатиб ўтамиз, пайшанба куни, 7 май санасида машғулот давомида Федерико Вальверде ва Аурельен Чуамени ўртасида оғзаки низо келиб чиққан, у кейинчалик кийиниш хонасида муштлашувга айланиб кетгани маълум бўлган эди.
Тўқнашув натижасида уругвайлик футболчининг боши ёрилган ва у шифохонага етказилганди. Ҳар икки ўйинчи ҳам клуб томонидан 500 минг евро миқдорида жаримага тортилишди.
