Флорентино Перес сайловда ғалаба қозонса, Дензел Думфрис «Реал»га ўтади
Мадриднинг «Реал» клуби «Интер»нинг ўнг қанот ҳимоячиси Дензел Думфрисни сотиб олишни режалаштирмоқда. The Athletic нашрининг хабар беришича, ушбу трансфер Флорентино Переснинг 7 июн куни бўлиб ўтадиган президентлик сайловидаги ғалабасига боғлиқ.
«Қироллик клуби» 30 ёшли футболчи билан музокаралар ўтказган ва унинг шахсий шартномаси ўтишга тўсиқ бўлмайди.
Нидерландиялик ҳимоячининг шартномасидаги товон пули 25 миллион еврони ташкил этади. Думфрис якунланган мавсумда Италия клуби сафида барча турнирларда 28 та ўйинда майдонга тушиб, 5 та гол ва 2 та голли узатмага муаллифлик қилди.
Футболчининг «Интер» билан амалдаги шартномаси 2028 йилнинг ёзига қадар мўлжалланган. Transfermarkt портали маълумотларига кўра, унинг айни пайтдаги бозор қиймати ҳам айнан 25 миллион еврога баҳоланмоқда.
