Флорентино Перес: «Негрейра иши — футбол тарихидаги энг йирик коррупцион можародир»
Мадриднинг «Реал» клуби президенти Флорентино Перес «Барселона» ва ҳакамлар техник қўмитаси (CTA) собиқ вице-президенти Хосе Мария Негрейра ўртасидаги ҳамкорликнинг коррупцион жиҳатларига тўхталиб ўтди. «Қаймоқранглилар» раҳбари ушбу иш бўйича тегишли ҳужжатлар УЕФАга тақдим этилганини маълум қилди.
«Яқинда биз «Барселона»нинг «Негрейра иши» ҳақида билдик ва бу ҳали ҳам давом этаётган ақл бовар қилмас вазиятдир. Коррупция иши! Футбол тарихидаги энг йирик можаро. «Барселона» йигирма йил давомида тўловларни амалга оширган, ўша ҳакамлар эса ҳануз фаолият юритмоқда. Буни тасаввур қилиб бўлмайди! Биз зудлик билан УЕФАга ҳужжатларни тақдим этамиз, чунки бу вазият тартибга солинишини талаб қилади», — деди Перес матбуот анжуманида.
Эслатиб ўтамиз, 2023 йилда «кўк-анор ранглилар»га Испания Қироллик футбол федерациясида (RFEF) ишлаган Негрейрага тўловларни амалга оширишда поракашлик айби қўйилган эди. «Барселона» 2001 йилдан 2018 йилга қадар тахминан 8,4 миллион евро миқдорида тўловларни амалга оширганликда айбланган.
Каталония клуби талқинига кўра, Негрейра ҳакамлик бўйича техник ҳисоботларни тузиш учун ташқи маслаҳатчи сифатида ёлланган. CTA собиқ вице-президенти эса ҳакамларга таъсир ўтказиш мақсадида пора олганини рад этиб келади.
