Флорентино Перес Моуриньюнинг «Реал»га қайтиш истагидан хабардор — Романо
Португалиялик мутахассис яна мадридликлар бошқарувини қўлга олиши мумкин.
ФОТО: Getty Images
Мадриднинг «Реал» клуби президенти Флорентино Перес жамоанинг собиқ мураббийи Жозе Моуриньюнинг клубга қайтиш истаги ҳақида хабардор қилинган. Бу ҳақда журналист Фабрисио Романо маълум қилди.
Манбанинг таъкидлашича, португалиялик мутахассис ўз яқинларига «қироллик клуби»да иккинчи бор имкониятга эга бўлишни ва жамоага қайтишни хоҳлаётганини билдирган. Романо «қаймоқранглилар» янги мураббий борасидаги якуний қарорни яқин вақт ичида қабул қилишини алоҳида қайд этган.
Моуринью 2010 йилдан 2013 йилга қадар «Реал»ни бошқарган. Унинг қўл остида Мадрид клуби Испания чемпионлиги, мамлакат Кубоги ва Суперкубогини қўлга киритган. Португалиялик мутахассиснинг «Бенфика» билан амалдаги шартномаси 2027 йилнинг ёзига қадар мўлжалланган.
Насрулло Каримов
Журналист