Фликнинг «Барселона» билан қачон янги шартнома имзолаши маълум
«Барселона» бош мураббийи Ханс-Дитер Флик клуб билан янги шартнома муддати бўйича келишувга эришди, у 2028-йилгача мўлжалланган ва яна бир мавсумга узайтирилиши мумкин. Немис мутахассисининг амалдаги меҳнат шартномаси 2027-йил ёзигача амал қилади. Бу ҳақда журналист Рожер Торелло ўзининг X ижтимоий тармоғидаги саҳифасида хабар берди.
Манба маълумотларига кўра, келаси ҳафта Фликнинг агенти Пини Захави сўнгги тафсилотларни келишиб олиш мақсадида Барселонага келади. Таъкидланишича, немис мутахассиси «Барселона» чемпион бўлиши биланоқ янги шартномани имзолайди.
Испания чемпионатининг 33-туридан сўнг «кўк-анорранглилар» 85 очко жамғариб, биринчи ўринни эгаллаб турибди ва иккинчи ўриндаги Мадриднинг «Реал» клубидан 11 очкога ўзиб кетган. Ла Лига мавсуми якунланишига бешта тур қолди.
