Флик: «Янада яхшироқ ҳаракат қилишимиз мумкин эди»
«Барселона» бош мураббийи Ҳанс-Дитер Флик Испания Ла Лигасининг 28-турида «Севилья» устидан қозонилган 5:2 ҳисобидаги йирик ғалабадан сўнг ўз фикр-мулоҳазаларини билдирди.
«Тўпни йўқотган вазиятларда прессингни янада самаралироқ амалга оширишимиз мумкин эди. Олдинда Чемпионлар Лигаси беллашувлари кутяпти, шунинг учун муносиб иштирок этишимиз жуда муҳим. Дани Олмо, Эспарт ва Канселу ажойиб ўйин намойиш этишди, бироқ жамоа янада яхшироқ ҳаракат қилишга қодир эди. Баъзи паллаларда тўпни узатиш суръати паст бўлди ва ўзимизга бўлган ишонч етишмади. Гавининг сафга қайтгани эса жамоамиз учун жуда хушхабар», — дея Фликнинг сўзларини келтиради Marca нашри.
Мураббий, шунингдек, Жоау Канселунинг ўйини ҳақида ҳам алоҳида тўхталиб ўтди:
«Канселунинг жамоага мослашиши учун маълум вақт талаб қилинди. Сўнгги бир неча учрашувда у ажойиб натижаларни кўрсатмоқда. Техник жиҳатдан у ниҳоятда кучли футболчи. Унинг киритган голи, пенальти ишлашдаги ҳаракатлари ҳамда офсайд қопқони билан боғлиқ вазиятлардаги ўйини барчасини тасдиқлаб турибди. Уни таркибга киритиш тўғри қарор бўлган».
Айни пайтда 28 та учрашувдан сўнг 70 очко жамғарган «Барселона» Испания чемпионати турнир жадвалида етакчилик қилмоқда ва иккинчи ўриндаги «Реал Мадрид»ни тўрт очкога ортда қолдирмоқда. «Севилья» эса 31 очко билан 14-поғонани эгаллаб турибди.
