Flik: «Yanada yaxshiroq harakat qilishimiz mumkin edi»
«Barselona» bosh murabbiyi Hans-Diter Flik Ispaniya La Ligasining 28-turida «Sevilya» ustidan qozonilgan 5:2 hisobidagi yirik g‘alabadan so‘ng o‘z fikr-mulohazalarini bildirdi.
«To‘pni yo‘qotgan vaziyatlarda pressingni yanada samaraliroq amalga oshirishimiz mumkin edi. Oldinda Chempionlar Ligasi bellashuvlari kutib turibdi, shuning uchun munosib ishtirok etishimiz juda muhim. Dani Olmo, Espart va Kanselu ajoyib o‘yin namoyish etishdi, biroq jamoa yanada yaxshiroq harakat qilishga qodir edi. Ba’zi pallalarda to‘pni uzatish sur’ati past bo‘ldi va o‘zimizga bo‘lgan ishonch yetishmadi. Gavining safga qaytgani esa jamoamiz uchun juda xushxabar», — deya Flikning so‘zlarini keltiradi Marca nashri.
Murabbiy, shuningdek, Joau Kanseluning o‘yini haqida ham alohida to‘xtalib o‘tdi:
«Kanseluning jamoaga moslashishi uchun ma’lum vaqt talab qilindi. So‘nggi bir nechta uchrashuvda u ajoyib natijalarni ko‘rsatmoqda. Texnik jihatdan u nihoyatda kuchli futbolchi. Uning kiritgan goli, penalti ishlashdagi harakatlari hamda ofsayd qopqoni bilan bog‘liq vaziyatlardagi o‘yini barchasini tasdiqlab turibdi. Uni tarkibga kiritish to‘g‘ri qaror bo‘lgan».
Ayni paytda 28 ta uchrashuvdan so‘ng 70 ochko jamg‘argan «Barselona» Ispaniya chempionati turnir jadvalida yetakchilik qilmoqda va ikkinchi o‘rindagi «Real Madrid»ni to‘rt ochkoga ortda qoldirmoqda. «Sevilya» esa 31 ochko bilan 14-pog‘onani egallab turibdi.
