Флик: «У ҳали ўз салоҳиятини тўлиқ намойиш этгани йўқ»
«Барселона» бош мураббийи Ҳанс-Дитер Флик жамоанинг ёш юлдузи Ламин Ямалнинг ўйини ва ўсиши борасида ўз фикрлари билан ўртоқлашди.
«Мен кўраётганларимдан мамнунман; у ўсишда давом этмоқда. У каби иқтидорли ўйинчилар учун энг муҳими — футболдан завқ олишдир. Биз унинг ривожланишига ёрдам бермоқчимиз. Охирги бир неча ўйинда унинг бор эътиборини майдонга қаратганини кўриш мумкин ва у кўпроқ гол ура бошлади. Шуни айтишим керакки, у ҳали ўз салоҳиятини тўлиқ очиб улгургани йўқ», — дея Фликнинг сўзларини келтиради AS нашри.
Жорий мавсумда Ямал Каталония клуби сафида барча турнирларда 29 та учрашувда майдонга тушиб, 14 та гол ва 11 та самарали узатмани ўз ҳисобига ёздириб қўйди.
Эслатиб ўтамиз, «Барселона» ҳозирда Испания чемпионатида 55 очко билан пешқадамлик қилмоқда. «Кўк-анорранглилар»нинг энг яқин таъқибчиси — Мадриднинг «Реал» клуби билан орадаги фарқ бор-йўғи битта очкони ташкил этади.
