FIFA ЖЧ-2026 учун футболчиларнинг майдонга тушиш тартибини ўзгартирмоқчи
FIFA 2026 йилги Жаҳон чемпионатида жамоаларнинг майдонга анъанавий тарзда чиқиб келишидан воз кечишни режалаштирмоқда. Бу ҳақда журналист Бен Жейкобс хабар берди.
Ҳозирда FIFA вакиллари анъанавий ёндашув ўрнига футболчиларнинг майдонга чиқишининг мутлақо янги формати синовдан ўтказмоқда. Шу билан бирга, ташкилот Клублар ўртасидаги Жаҳон чемпионатининг ҳал қилувчи босқичларида қўлланилган «якка тартибда чиқиш» тизимидан (стадион диктори ҳар бир футболчини алоҳида эълон қилиб майдонга чақириши) фойдаланмоқчи эмас.
Қайд этилишича, FIFA ҳар бир футболчини шахсий даражада тарғиб қилишни мақсад қилган, бироқ бунда баскетболдаги NBA лигасига хос бўлган ёндашувни (Клублар ўртасидаги ЖЧда синаб кўрилган вариант) айнан нусхаламасликка ҳаракат қилмоқда.
Эслатиб ўтамиз, ЖЧ-2026 баҳслари АҚШ, Канада ва Мексика стадионларида бўлиб ўтади. Турнир 11 июндан 19 июлгача давом этиши белгиланган.
