FIFA президентининг маслаҳатчиси истеъфога чиқди
FIFA президенти Жанни Инфантинонинг катта маслаҳатчиси Карлос Кордейро Жаҳон чемпионати тижорий ҳуқуқларининг бир қисмини хусусий инвесторларга сотиш режасига норозилик билдиради ва лавозимини тарк этди. Унинг истеъфоси дарҳол кучга киргани маълум қилинди.
Кордейро ушбу ташаббусни “футбол учун ёмон келишув” деб баҳолади. Унинг фикрича, FIFA 2022–2026 йиллар оралиғида қарийб 15 миллиард доллар даромад олиши кутилётган бир пайтда Жаҳон чемпионати каби энг қиммат активининг бир қисмини сотишга ҳеч қандай зарурат йўқ.
Собиқ АҚШ Футбол федерацияси президенти бўлган Кордейро 2021 йилдан буён FIFA президентининг катта маслаҳатчиси лавозимида ишлаб келаётган эди. У мазкур лойиҳа ишлаб чиқилишида иштирок этмаганини ҳамда унга мутлақо қарши эканини таъкидлади.
Эслатиб ўтамиз, FIFA Жаҳон чемпионати ва бошқа йирик мусобақаларнинг тижорий ҳуқуқларини бошқарувчи алоҳида компания ташкил этиш ҳамда унинг 20 фоизгача улушини хусусий инвесторларга сотишни режалаштирмоқда. Ушбу ташаббус УЕФА ва қатор миллий футбол федерацияларининг кескин норозилигига сабаб бўлган.
