ФИФА Испанияни мусулмонларни камситгани учун жазолади
Халқаро футбол федерацияси (ФИФА) Испания терма жамоасига нисбатан интизомий жазо қўллади. Бунга 2026-йил март ойида Мисрга қарши ўтказилган ўртоқлик учрашувида испаниялик мухлисларнинг мусулмонларга қарши ҳақоратли ҳайқириқлари сабаб бўлди. ФИФА Испания футбол федерациясини 20 минг доллар жаримага тортиб, терма жамоанинг навбатдаги уй ўртоқлик учрашувида стадион сиғимининг камида 15 фоизини ёпишга қарор қилди. Бу ҳақда Reuters ахборот агентлиги хабар бермоқда.
Манбага кўра, 31-март куни Барселонадаги ‘‘RCDE Stadium’’да бўлиб ўтган Испания — Миср учрашувида маҳаллий мухлислар икки бор мусулмонларга қарши ҳайқириqlar қилган. Жумладан, трибунадан ‘‘Ким сакрамаса, мусулмон’’ деган шиор янграган. Вазият такрорлангач, стадион сухандони мухлисларни огоҳлантирган ва катта экранда камситишнинг ҳар қандай кўринишига қарши махсус хабар намойиш этилган. Мазкур учрашув 0:0 ҳисобида якунланган.
Ҳодиса Испания терма жамоаси ва ‘‘Барселона’’ футболчиси Ламин Ямалнинг ҳам кескин норозилигига сабаб бўлган. Мусулмон футболчи мухлисларнинг ҳаракатини ҳурматсизлик ва ирқчилик деб баҳолаб, динни ҳақорат воситасига айлантиришни қоралаган. Испания футбол федерацияси эса интизомий жараёнда ҳайқириқларни бошқа модда асосида кўриб чиқишни сўраган. Бироқ ФИФА бу эътирозни рад этиб, мазкур ҳолатни камситиш деб топган. Федерация дастлабки апелляцияси ҳам рад этилгач, Спорт арбитраж судига (CAS) мурожаат қилишга қарор қилган.
Маълумот учун, ФИФА қарорига кўра, Испания терма жамоасининг навбатдаги уй ўртоқлик учрашувида стадиондаги ўринларнинг камида 15 фоизи оддий мухлислар учун ёпилиши керак. Шу билан бирга, ушбу жойлардан оилалар, талабалар ва камситишга қарши курашувчи ташкилотлар вакиллари учун фойдаланишга рухсат берилиши мумкин. ФИФА интизом қўмитаси Испания федерациясининг ҳодисага тезкор муносабат билдиргани ва масъулларни аниқлашда ҳамкорлик қилганини инобатга олган. Ҳозирча жазо кучда қолмоқда.
