Фернандеш ёзда «Манчестер Юнайтед»ни тарк этиши мумкин
«Манчестер Юнайтед» ярим ҳимоячиси Бруну Фернандеш жорий ёзги трансферлар ойнасида клубини ўзгартириши мумкин.
Журналист Сулаймон Родопнинг маълум қилишича, «қизил иблислар» 30 ёшли португалиялик футболчини 42 миллион фунт стерлинг эвазига сотишга тайёр.
Манбага кўра, Бруну Фернандешга Туркиянинг «Галатасарой» клуби жиддий қизиқиш билдирмоқда. Бироқ Истанбул жамоаси футболчи талаб қилаётган юқори маошни тўлаш имкониятига эга эмас.
Бруну Фернандеш 2020 йилда Лиссабоннинг «Спортинг» клубидан «Манчестер Юнайтед»га 65 миллион евро эвазига ўтган эди. Унинг инглиз клуби билан амалдаги шартномаси 2027 йил 30 июнгача мўлжалланган.
2025/26 йилги мавсумда португалиялик ярим ҳимоячи барча мусобақаларда 37 та ўйинда иштирок этиб, 9 та гол урди ва 22 та голли узатмани амалга оширди.
Transfermarkt портали Бруну Фернандешнинг бозор қийматини 35 миллион евро деб баҳолаган.
