Фернандеш «МЮ»даги келажаги борасида бир қарорга келди — TS
«Манчестер Юнайтед» ярим ҳимоячиси Бруну Фернандеш Саудия Арабистони клубларининг қизиқишига қарамай, жамоада қолишга қарор қилди. Бу ҳақда talkSPORT хабар берди.
Манба маълумотига кўра, 31 ёшли футболчи жаҳон чемпионатига қадар манкунианликлар раҳбарияти билан расмий музокаралар ўтказмаган, бироқ у жамоадошлари ва атрофидагиларга қолиш нияти борлигини аллақачон маълум қилган. Таъкидланишича, португалиялик футболчи «Манчестер Юнайтед»да камида яна бир йил ўйнашни истайди.
Фернандеш 2020 йил январь ойидан бери «Манчестер Юнайтед»да ўйнаб келмоқда. Ўтган мавсумда ярим ҳимоячи барча турнирларда 37 та ўйинда майдонга тушиб, тўққизта гол урди ва 22 та голли узатмага муаллифлик қилди.
Футболчининг клуб билан амалдаги меҳнат шартномаси 2027 йил ёзига қадар мўлжалланган. Transfermarkt порталида тақдим этилган маълумотларга кўра, футболчининг бозор қиймати 35 млн еврони ташкил қилади.
