«Фенербахче» сардори Мерт Яндаш букмекерлик ўйинлари сабабли бир йилга дисквалификация қилинди
«Фенербахче» клуби сардори ва яримҳимоячиси Мерт Яндаш букмекерлик ўйинларида иштирок этгани учун футбол фаолиятидан бир йил муддатга дисквалификация қилинди. Бундай қарор Профессионал футбол интизом қўмитаси (PFDK) томонидан қабул қилинди. Бу ҳақда Туркия футбол федерацияси (TFF) расмий сайти хабар бермоқда.
Мерт Яндаш 2025 йилнинг декабрь ойида келишилган ўйинлар ва ноқонуний тикишлар бўйича олиб борилаётган тергов доирасида ҳибсга олинган эди. 2026 йилнинг февралида унга нисбатан расмий айбловлар эълон қилинди. Маълумотларга кўра, футболчи 17 йил-у 10 ойгача озодликдан маҳрум этилиши мумкин эди. Бироқ жорий йилнинг апрель ойи бошида, тўрт ойлик қамоқ жазосидан сўнг, Яндаш озодликка чиқарилган.
31 ёшли яримҳимоячи 2020 йилнинг ёзидан буён «Фенербахче» шарафини ҳимоя қилиб келмоқда. Ўтган давр мобайнида у барча турнирларда 149 та ўйинда майдонга тушиб, 11 та гол ва 25 та голли узатмани амалга оширган. Футболчининг клуб билан амалдаги шартномаси 2026 йилнинг ёзига қадар амал қилади.
