«Фенербахче» Салоҳга қизиқиш билдирмоқда
«Ливерпул» ва Миср терма жамоаси ҳужумчиси Мохамед Салоҳ фаолиятини Туркия чемпионатида давом эттириши мумкин. Бу ҳақда A Spor нашри хабар берди.
Манба хабар беришича, футболчини ўз сафига қўшиб олишга Туркиянинг «Фенербахче» клуби қизиқиш билдирмоқда. Истанбулликлар раҳбарияти футболчининг агентлари билан аллақачон иккита учрашув ўтказган.
Музокараларда клуб номидан «Фенербахче» бошқарув кенгаши аъзоси Эртон Торунўғуллари иштирок этган.
Хабар қилинишича, мисрлик футболчининг вакиллари ўз мижози учун йилига 20 миллион евро маош сўраган. Шунингдек, томонлар ҳозирча бўлиб ўтмаган учинчи учрашувни ўтказишга келишиб олган.
Мохамед Салоҳнинг «Ливерпул» билан шартномаси 2027 йил ёзигача мўлжалланган, бироқ футболчи мавсум охирида Англия жамоасидан кетишини аллақачон эълон қилган.
