«Фейеноорд» Раҳим Стерлинг билан шартномани бекор қилиши мумкин
«Фейеноорд» клуби ҳужумчи Раҳим Стерлинг билан шартнома имзолаганидан атиги икки кун ўтиб, ушбу келишувни бекор қилиш имкониятини кўриб чиқмоқда. Интизомий қоидабузарлик туфайли футболчига клуб машғулотларида қатнашиш тақиқланган. Бу ҳақда Topskills Sports UK саҳифаси хабар бермоқда.
Манба маълумотларига кўра, трансфер амалга ошганидан 24 соат ўтиб, Стерлингга клуб базасига кириш расман тақиқланган. Ҳозирда унинг шартномаси яқин вақт ичида бекор қилиниши мумкинлиги айтилмоқда. «Фейеноорд» раҳбарияти футболчи томонидан содир этилгани тахмин қилинаётган жиддий интизомий қоидабузарлик юзасидан шошилинч суриштирув ишларини бошлаган.
Гарчи трансфер 12 февраль куни расман тасдиқланган бўлса-да, клуб Стерлингнинг жамоага қўшилиш жараёнини тўхтатиб қўйди. Агар айбловлар ўз тасдиғини топса, футболчига нисбатан шартномани дарҳол бекор қилиш ёки клуб фаолияти билан боғлиқ ҳар қандай жараёндан узоқ муддатли четлатиш чораси қўлланилиши мумкин.
Ҳозирча на клуб мутасаддилари, на футболчининг вакиллари ушбу вазият юзасидан расмий изоҳ беришгани йўқ.
