Федерико Вальверде «Реал Мадрид»нинг февраль ойидаги энг яхши футболчиси деб топилди
Мадриднинг «Реал» клуби яримҳимоячиси Федерико Вальверде жамоасининг февраль ойидаги энг яхши ўйинчиси соврини соҳибига айланди. Ўтган ой давомида уругвайлик хавбек олтита учрашувда майдонга тушиб, битта гол урди ва учта самарали узатмани амалга оширди.
«Ушбу мукофотни яна бир бор қўлга киритганимдан фахрланаман ва жуда бахтлиман. Бунинг учун менга яхши натижаларга эришишда кўмаклашаётган жамоадошларимдан миннатдорман. Жамоамизда ижобий динамика ва юқори энергия борлигига ишонаман. Биз ўтган ойдаги каби бор эътиборимизни мақсадларимизга қаратганмиз. Ҳаммасидан кўнглим тўқ.
Жамоамиз жуда аҳил ва барча футболчилар биргаликда курашмоқда. Биз мавсум охирига қадар қолган барча титутларни қўлга киритишга қатъий қарор қилганмиз. Асосийси, ҳар бир ўйинчи, жумладан, имконият берилаётган академия тарбияланувчилари ҳам «Реал» юқори чўққиларда қолиши учун бор кучиини сарфламоқда», — дея Вальверденинг сўзларини келтиради клуб расмий сайти.
