Федерико Кьеза «Ювентус»га қайтишга тайёр — манба
«Ливерпуль»нинг ўнг қанот ҳужумчиси Федерико Кьеза «Ювентус»га қайтишга тайёр. Турин клуби футболчини кейинчалик сотиб олиш ҳуқуқи билан ижарага олиш вариантини кўриб чиқмоқда, деб хабар беради инсайдер Николо Скира.
Манбага кўра, томонлар келишув тафсилотларини муҳокама қилишни келаси ҳафтадаёқ бошлаши кутилмоқда. Шу билан бирга, «Ливерпуль» раҳбарияти футболчи билан вақтинча эмас, балки тўлиқ трансфер асосида хайрлашишни афзал кўрмоқда.
Италиялик футболчи 2024 йил август ойида «Ювентус»дан «Ливерпуль»га 12 миллион евро эвазига кўчиб ўтган эди. Унинг мерсисайдликлар билан тузилган шартномаси 2028 йил июн ойининг охиригача амал қилади. Transfermarkt маълумотларига кўра, Кьезанинг ҳозирги бозор қиймати 18 миллион еврони ташкил этади.
«Ювентус» сафидаги фаолияти давомида Кьеза 131 та учрашувда майдонга тушиб, 32 та гол ва 24 та голли узатмага муаллифлик қилган. Жорий мавсумда эса у «Ливерпуль» таркибида 20 ўйинда қатнашиб, жами 469 дақиқа майдонда бўлди ҳамда икки гол ва уч ассист муаллифига айланди.
