Federiko Kyeza «Yuventus»ga qaytishga tayyor — manba
«Liverpul»ning o‘ng qanot hujumchisi Federiko Kyeza «Yuventus»ga qaytishga tayyor. Turin klubi futbolchini keyinchalik sotib olish huquqi bilan ijaraga olish variantini ko‘rib chiqmoqda, deya xabar beradi insayder Nikolo Skira.
Manbaga ko‘ra, tomonlar kelishuv tafsilotlarini muhokama qilishni kelasi haftadayoq boshlashi kutilmoqda. Shu bilan birga, «Liverpul» rahbariyati futbolchi bilan vaqtinchalik emas, balki to‘liq transfer asosida xayrlashishni afzal ko‘rmoqda.
Italiyalik futbolchi 2024 yil avgust oyida «Yuventus»dan «Liverpul»ga 12 million yevro evaziga ko‘chib o‘tgan edi. Uning mersisaydlar bilan tuzilgan shartnomasi 2028 yil iyun oyining oxirigacha amal qiladi. Transfermarkt ma’lumotlariga ko‘ra, Kyezaning hozirgi bozor qiymati 18 million yevroni tashkil etadi.
«Yuventus» safidagi faoliyati davomida Kyeza 131 ta uchrashuvda maydonga tushib, 32 ta gol va 24 ta golli uzatmaga mualliflik qilgan. Joriy mavsumda esa u «Liverpul» tarkibida 20 o‘yinda qatnashib, jami 469 daqiqa maydonda bo‘ldi hamda ikki gol va uch assist muallifiga aylandi.
