Файзуллаев трансферида молиявий баҳслар давом этмоқда
Россияда ўзбек футболчиси Аббосбек Файзуллаевнинг ЦСКАдан Туркиянинг «Истанбул Башакшехир» жамоасига ўтган трансфери атрофида тортишувлар давом этмоқда. Халқаро санкциялар туфайли турклар деярли бир ой давомида тўловни амалга ошира олмаган эди.
Яқинда «Башакшехир» маблағни ўтказди ва ЦСКА футболчининг янги клуби учун рухсат берувчи сертификатни йўллади. Бироқ 24 август куни маълум бўлишича, Москва клуби кутилган 7,5 млн евро ўрнига фақат 6 млн евро олган. Қолган 1,5 млн евро ҳозирча Туркиядаги махсус ҳисобда сақланмоқда.
Россиялик журналистлардан айримлари ЦСКА ушбу маблағни Туркияда қолдириб, янги трансферлар учун ишлатишни режалаштираётганини тахмин қилмоқда. Бошқалар эса «Башакшехир» ўзгача молиявий ўйин ўтказаётганини таъкидламоқда. Расмий жиҳатдан келишув ёпилган бўлса-да, тўлов масаласидаги ноаниқлик ҳали ҳам сақланиб турибди.
