Файзуллаев трансфери учун пул ҳали ҳам ўтказилмади
2025 йил 12 август ҳолатига кўра, ўзбекистонлик яримҳимоячи Аббосбек Файзуллаевнинг Москва ЦСКАдан Туркиянинг «Башакшехир» клубига ўтиши бўйича тўлов ҳали амалга оширилмаган.
ЦСКА матбуот хизмати директори Кирилл Брейдо маълум қилишича, турк клуби келишилган 7,5 миллион еврони ҳозиргача тўламаган. Мазкур сумма шартнома асосида бир марталик тўлов сифатида ўтказилиши керак эди. Трансфер июл охирида амалга ошган бўлиб, Москва клуби ҳануз тўловни кутиб турибди.
«Биз турк клуби билан фаол мулоқотдамиз ва молиявий масала ҳафта охиригача ҳал бўлишига умид қиламиз», – деди Брейдо.
ЦСКА учун халқаро молиявий операциялардаги қийинчиликлар янги эмас. Клуб бир неча йилдан бери ташқи чекловлар шароитида фаолият юритмоқда. Хусусан, ФИФА Чидера Эджуке трансфери бўйича қарз туфайли клубга санкция жорий этган, бу эса янги футболчиларни рўйхатдан ўтказиш имкониятини чеклайди.
Бундан ташқари, 2022 йилда ЦСКА АҚШ санкцияларига ҳам дуч келган. Бу қарор клубнинг ўша пайтдаги асосий акциядори - Россия давлат корпорацияси «ВЭБ.РФ» санкция рўйхатига киритилгани билан боғлиқ эди.
