Fayzullaev transferi uchun pul hali ham o‘tkazilmadi
2025 yil 12 avgust holatiga ko‘ra, o‘zbekistonlik yarimhimoyachi Abbosbek Fayzullaevning Moskva CSKAdan Turkiyaning “Bashakshehir” klubiga o‘tishi bo‘yicha to‘lov hali amalga oshirilmagan.
CSKA matbuot xizmati direktori Kirill Breydo ma’lum qilishicha, turk klubi kelishilgan 7,5 million evroni hozirgacha to‘lamagan. Mazkur summa shartnoma asosida bir martalik to‘lov sifatida o‘tkazilishi kerak edi. Transfer iyul oxirida amalga oshgan bo‘lib, Moskva klubi hanuz to‘lovni kutib turibdi.
“Biz turk klubi bilan faol muloqotdamiz va moliyaviy masala hafta oxirigacha hal bo‘lishiga umid qilamiz”, – dedi Breydo.
CSKA uchun xalqaro moliyaviy operatsiyalardagi qiyinchiliklar yangilik emas. Klub bir necha yildan beri tashqi cheklovlar sharoitida faoliyat yuritmoqda. Xususan, FIFA Chidera Edjuke transferi bo‘yicha qarz tufayli klubga sanksiya joriy etgan, bu esa yangi futbolchilarni ro‘yxatdan o‘tkazish imkoniyatini cheklaydi.
Bundan tashqari, 2022 yilda CSKA AQSh sanksiyalariga ham duch kelgan. Bu qaror klubning o‘sha paytdagi asosiy aksiyadori – Rossiya davlat korporatsiyasi “VEB.RF” sanksiya ro‘yxatiga kiritilgani bilan bog‘liq edi.
