Файзуллаев Истанбулда: янги клуб ва янги имкониятлар
24 июл куни Аббосбек Файзуллаев Туркиянинг «Истанбул Башакшехир» жамоасига ўтиши арафасида тиббий кўрикдан ўтиши керак эди. Бу трансфер катта қизиқиш уйғотди. Чунки мазкур клуб нафақат Европа мусобақаларида қатнашади, балки Туркия президенти Режеп Таййип Эрдўған томонидан қўллаб-қувватланиши билан ҳам машҳур. Шунингдек, бу ерда яқинда Элдор Шомуродов ҳам тўп сура бошлади.
Мутахассис Эльвин Керимов сўзларига кўра, охирги йилларда «Башакшехир» чемпионлик учун кураша олмаётган бўлса-да, клубнинг салоҳияти ҳамон юқори. У доимий равишда халқаро мусобақаларда қатнашиб келмоқда ва бу ўз навбатида Файзуллаев учун тажриба тўплашда муҳим аҳамиятга эга бўлади. Албатта, бу клуб ҳозирча «Галатасарай» ёки «Фенербахче» каби топ жамоалар даражасида эмас, аммо Аббосбек учун янги босқич сифатида қаралиши мумкин. Бу ўтиш кейинчалик кучлироқ чемпионатларга ёки Туркиянинг етакчи клубларига йўл очиши эҳтимолини оширади.
Керимовнинг таъкидлашича, Файзуллаев учун бу таклифни рад этиш мантиқан тўғри эмасди — молиявий томонлама ҳам футболчи, ҳам ЦСКА учун манфаатли келишув бўлган. Қолаверса, Истанбул шаҳрида яшаш имконияти ҳам муҳим омил саналади — бу шаҳар ўзининг маданияти ва муҳити билан ўзбекистонлик футболчилар учун қулай.
Янги жамоада Аббосбекни 45 ёшли мураббий Атан Чагдаш бошқаради. У футболчилик фаолияти давомида «Бешикташ» билан Туркия Кубогини ва «Базель» билан Швейцарияда “дубль”ни қўлга киритган. Сентябрда у «Башакшехир» бош мураббийи сифатида икки йиллик фаолиятини нишонлайди.
