ЎФА делегацияси Парагвайда бўлиб ўтган 75-ФИФА Конгрессида иштирок этди
Парагвай пойтахти Асунсьон шаҳрида ФИФАнинг 75-конгресси бўлиб ўтди. Унда дунёнинг кўплаб мамлакатлари қаторида Ўзбекистон футбол ассоциацияси (ЎФА) делегацияси ҳам иштирок этди. Ташрифга ЎФАнинг биринчи вице-президенти Равшан Ирматов раҳбарлик қилди.
Конгресс кун тартибидан Дисциплинар, Этика, Апелляция, Рахбарият, Аудит ва Мослик қўмиталарига аъзолар сайлови, ФИФА аъзолари ва Кенгаш томонидан киритилган таклифларни муҳокама қилиш, футболда ирқчиликка қарши курашни мустаҳкамлаш масалалари ўрин олди.
Йиғилишда 2031 йилдан бошлаб Аёллар ўртасидаги Жаҳон чемпионатида иштирокчи жамоалар сони 48 тагача кенгайтирилиши расман тасдиқланди.
ФИФА президенти Жанни Инфантино чемпионатларнинг янги форматлари ҳақида сўзлар экан, бу ўзгаришлар тарихдаги энг турли-туман мусобақаларни яратишини, кўплаб жамоаларга халқаро майдонда ўзини кўрсатиш имкони берилишини таъкидлади. Унинг фикрича, бу ўзгаришлар футболни оммалаштириш ва барча қитъалар учун имкониятлар яратишга қаратилган.
Конгресс доирасида шу йил ўтказиладиган Клублар ўртасидаги жаҳон чемпионати ва келаси йили бўладиган миллий терма жамоалар ўртасидаги жаҳон чемпионати муҳокама қилинди.
Маълумот учун, 76-ФИФА Конгресси 2026 йил 30 апрель куни Канаданинг Ванкувер шаҳрида бўлиб ўтади.