Европанинг беш топ-клуби “Штутгарт”нинг 20 ёшли ҳимоячисига қизиқмоқда
“Штутгарт” ҳимоячиси Финн Ельч Европанинг бир қатор топ-клублари эътиборига тушди. 20 ёшли германиялик футболчини “Арсенал”, “Ливерпуль”, “Манчестер Юнайтед”, “Бавария” ва “Ювентус” ўз сафига қўшиб олишга қизиқмоқда. Бу ҳақда инсайдер Экрем Конур маълум қилди.
Манбага кўра, “Штутгарт” ёш ҳимоячисини сотишга рози бўлса, унинг трансферидан қарийб 50 миллион евро ишлаб олишни мақсад қилган. Ельчнинг клуб билан амалдаги шартномаси 2030 йил 30 июнгача мўлжалланган.
Германия ёшлар терма жамоаси аъзоси жорий Бундеслига мавсумида икки учрашувда майдонга тушиб, битта голли узатмани амалга оширди. Шунингдек, у бир марта сариқ карточка олди. Transfermarkt футболчининг бозор қийматини 35 миллион евро деб баҳоламоқда.
Маълумот учун, Финн Ельч марказий ҳимоячи сифатида ҳаракат қилади ва “Штутгарт” сафига 2025 йил февралида “Нюрнберг”дан келиб қўшилган. У 2025 йилда Германиянинг U19 тоифасидаги энг яхши ёш футболчиларига бериладиган Фриц Вальтер олтин медалини ҳам қўлга киритган.
