«Эвертон»нинг 71 ёшли мухлиси ирқчиликда айбланиб ҳибсга олинди
АПЛнинг 35-тури доирасида бўлиб ўтган «Эвертон» ҳамда «Манчестер Сити» (3:3) жамоалари ўртасидаги учрашувда «шаҳарликлар» ҳужумчиси Антуан Семеньога нисбатан ирқчи характеридаги ҳақоратлар йўллаган 71 ёшли мухлис ҳибсга олинди. Бу ҳақда The Times нашри хабар бермоқда.
Манба берган маълумотларга кўра, ушбу фанат гаров эвазига қўйиб юборилган, бироқ унга ўйин кунлари стадионга яқинлашиш тақиқланган.
Таъкидланишича, учрашув якунлангач, ижтимоий тармоқларда «Манчестер Сити» ҳимоячиси Марк Гехи ҳам ирқчилик ҳужумларига учраган. Бунга футболчининг ўйин давомида гол билан якунланган хатога йўл қўйгани сабаб бўлган.
Ушбу баҳсдан сўнг «Эвертон» 48 очко билан Англия чемпионати турнир жадвалининг 10-поғонасини эгаллаб турибди. «Манчестер Сити» эса 71 очко билан иккинчи ўринда бормоқда.
